Giduso sa mental health consultant nga si Stella Setier-Ferrarez ang panginahanglan sa pagrepaso sa mga palisiya sa Department of Education bahin sa paggamit sa mga cellphone ug gadgets sa mga tunghaan.
Iyang gipamugos nga lisud i-ban ang gadgets alang sa mga nag-edad sa 16 anyos paubos tungod kay ang mismong sistema sa edukasyon, sama sa online classes ug pagpasa og mga assignment, naggamit man niini.
Gipamugos sa eksperto nga kon gusto mapanalipdan ang mga batan-on sa mga dautang epekto sa teknolohiya, kinahanglan nga magsugod ang pagmatngon samtang bata pa ang usa ka tawo.
Kini nagpasabot nga sugod pa lang sa batan-ong edad kinahanglan likayan sa mga ginikakan nga ma-expose sa paggamit cellphone ang ilang anak aron dili kini makaporma sa adiksyon o pag-abusar sa paggamit niini samtang nagkataas ang edad.
Si Ferrarez namugos nga kinahanglang balansehon ang kapuslanan sa teknolohiya sa pagkat-on ug ang seguridad sa mental nga kahimtang sa mga estudyante aron dili kini mahisama sa hitabo sa in-campus shooting sa Tacloban ug Zamboanga City, ug knife attack sa mga tunghaan sa Luzon. Wala pay labot niini ang mga tinun-an nga nasanta sa school entrance kay nagdala sa armas, ug hinagiban.
Midugang pa niini ang mga bomb threats nga gitoohang gipalihok sa pipila ka gangs sa mga batan-on ning syudad.
Naglaum si Ferrarez nga magbaton sa mas klarong giya ang DepEd ug ang mga ginikanan bahin sa saktong pagdumala sa exposure sa mga bata sa digital nga mga kasangkapan.
Nagpabilin nga usa sa mga importanteng hisgutanan sa katilingban ang epekto sa gadgets sa pag-uswag ug pamatasan sa bag-ong henerasyon
