Gibana-bana kapin 20 ka balay ang naugdaw sa dakong sunog nga nahitabo atubangan sa barangay hall sa Barangay 30, ning syudad, kaganina sa buntag.
Gibutyag ni City District Fire Marshal Fire Superintendent Reynante Lorono nga “Electrical ignition” o nagsila’ nga kuryente ang gitotokan sa imbestigador nga posibling hinungdan sa pagkalayo sa mga balay nga nahimutang sa Ebarle Street.
Gikompirmar ni Lorono nga nagsugod ang kalayo sa balay ni Dondon Ramos ug paspas nga mitabok sa pikas balay tungod sa nagkadikit nga mga puy-anan ug napabagah ang kalayo sa kakusog sa hangin niadtong tungura.
Walay natala nga namatay o samaran sa insidente. Gipahimangnuan sa mga bombero ang publiko nga mag-amping kanunay pinaagi sa pag-unplug sa mga kagamitan sa kuryente, paglikay sa paggamit sa sobrang extension wires, ug pagpa-rewire sa mga balay nga lapas na sa napulo ka tuig.
Labaw sa tanan, mi-abiso ang BFP sa mga tagbalay nga mas maayo kung adunay firewall aron dili basta-basta nga mukatay ang kalayo sa silingan.
