Matud ni NBI Director Melvin Matibag, 47 ang kinatibuk-ang ihap sa mga flood control projects sa maong lungsod, apan upat pa lamang ang pormal nila nga naimbestigahan, diin diha-diha dayon nilang nakit-an nga aduna kini daghang iregularidad.
Gitawag kini ni Matibag nga “modus,” diin matud pa butngan og blur effects ug gi-ayo ang filter ug color sa mga orihinal nga hulagway aron ipagawas nga managlahing proyekto.
Dungan niini, gisusi na usab sa ahensya ang kompanya nga Davao Genesis 88 Incorporated nga bisan pa og bag-o pa lamang kini natukod niadtong tuig sa 2016, apan nakadawat na kini og dakong bahin gikan sa binilyong mga proyekto sa flood control sa Davao sugod sa tuig sa 2019 hangtud 2023.
Ang Chairman sa maong kompanya kay ang kanhi Sports Adviser ni kanhi Presidente Rodrigo Duterte nga si Glenn Escandor nga migawas usab sa record nga nagbayad kini sa gibana-banang P19.9 milyon nga kantidad sa political advertisement alang kang Vice President Sara Duterte niadtong 2022 elections. (raniel mahunyag)
