Gipangusgan sa League of Cities of the Philippines ang pagpadayon sa interconnectivity sa mga siyudad sa Mindanao pinaagi sa pagbuhi sa Mindanao Railway Project nga nasugdan pa sa administrasyon ni kanhi Presidente Rodrigo Duterte.
Gipadayag ni Cagayan de Oro City Information Office Information Officer Jade Adeser nga lakip sa natuki sa LCP Board Meeting ug sa Sisterhood City Agreement tali sa Cagayan de Oro ug San Juan City ang pagpangayo og pondo sa nasyonal nga panggamhanan alang sa maong proyekto.
Gumikan niini, gipasabot nga ang maong lakang maghatag og mas paspas nga biyahe ug mas lig-on nga inter-island transport pinaagi sa mga tulay ug pampublikong sakyanan sa tibuok rehiyon.
Samtang, nagpabilin nga nagkahiusa ang mga punoan sa mga dakbayan sa pagduso sa maong hangyo aron mahatagan kini og igong pundo alang sa kalambuan sa ekonomiya sa Mindanao.-
