Gitinguha sa Department of Labor and Employment (DOLE) nga ipatuman ang mga giya base sa lebel sa heat index aron mas tukma ang mga safety measures alang sa riders. Ubos sa gisugyot nga labor advisory, adunay upat ka heat index categories nga naglakip sa caution, extreme caution, danger ug extreme danger.
Kung moabot sa 42°C hangtod 51°C ang heat index, mahimong balhinon o suspendihon ang pipila ka delivery assignments ug adunay katungod ang riders sa pagdumili sa delikadong biyahe nga walay silot.
Kon moabot o molabaw sa 52°C ang heat index, suspendihon ang tanang outdoor deliveries gawas sa mga emerhensiya ug esensyal nga serbisyo nga mahimo pa nga luwas nga mapatuman.
Giingon sa DOLE nga ang mga lakang gitumong aron dili maaberya ang mga kustomer samtang gipaningkamotan ang pagpanalipod sa kahimsog ug kinabuhi sa mga delivery riders.
