Gipalapdan sa National Irrigation Administration (NIA) ang paggamit sa solar pump irrigation projects sa tibuok nasud diin nakaabot na kini sa kapin 30,000 ka yunit o katumbas sa 100 megawatts nga kapasidad.
Matod ni Engr. Eduardo “Eddie” G. Guillen, ang hepe sa NIA, nga mas ubos ang gasto sa pagtukod sa maong sistema kay nagkantidad lamang kini sa mga P700,000 matag ektarya kumpara sa tradisyonal nga dam nga moabot sa P1.6 milyon matag ektarya.
Gipasabot sa opisyal nga ang solar pump irrigation system adunay kumpletong pasilidad ug mahimong gamitan sa modernong teknolohiya sama sa artificial intelligence aron mas episyente ang operasyon.
Dugang pa sa opisyal, kadaghanan sa mga proyekto mahimong mahuman sulod lamang sa unom ka bulan hangtod usa ka tuig, nga mas paspas kumpara sa mga regular nga dam nga kasagarang molungtad og pipila ka tuig sa pagtukod.
Sa pagkutlo ning balita, padayong gipalambo sa NIA ang programa aron mapadali ang paghatag sa irigasyon ug mapalambo ang produksiyon sa agrikultura sa nasud.
