Gibutyag ni Philippine National Police (PNP) chief PGen. Jose Melencio Nartatez Jr. nga gihulat pa nila ang rekomendasyon sa Criminal Investigation and Detection Group (CIDG) ug Philippine Drug Enforcement Agency (PDEA) sa ilang mga gisubpoena na dunay kalambigitan sa drug shipment nga nababagan sa nasud sa Laos nga ipasulod unta sa Pilipinas.
Matud ni Nartatez, gahulat ang ilang ahensya sa rekomendasyon ug pinal nga konklusyon sa CIDG ug PDEA aron matino kung unsang mga kaso ang ilang ipasaka batok sa mga indibidwal nga nalambigit sa maong ilegal nga kargamento.
Gipahibalo sa hepe sa kapulisan nga naimbestigahan na nila ang dili moubos sa 40 ka mga personalidad ug na-repaso na usab ang pipila ka mga dokumento nga dunay kalabutan sa drug shipment nga nakumpiska sa nasud sa Laos.
Miingon usab si Nartatez nga usa ka pilipino ang matud pa nadakpan sa Laos ug gisundan na sa mga imbestigador ang mga dokumento ug ebidensya nga gikan sa maong pagkadakop pabalik dinhi sa Pilipinas.
Dugtong niini, gibutyag usab sa hepe nga dili moubos sa 11 ka nag-unang mga indibidwal ang ilang ginalantaw nga aduna gayuy kalambigitan sa maong kargamento. (raniel mahunyag)
