Gipanawagan ni Senate President Sherwin Gatchalian ngadto sa mga otoridad nga sigurohong luwas ug hapsay ang pagpahigayon sa pagsikop kang Senador Ronald “Bato” dela Rosa aron malikayan ang kapintasan ug posibleng pagkamatay sa mga sibilyan ug operatiba.
Matud ni Gatchalian, mahinungdanon nga masiguro ang kaluwasan ni Dela Rosa ug sa mga otoridad nga magpahigayon sa maong operasyon tungod kay peligroso ang ingon niini nga matang sa pagpatuman sa balaod.
Gihatagan usab og gibug-aton sa Senador nga kinahanglang hapsay ang pagsikop kang Dela Rosa, ilabi na human sa gipagawas nga pahayag sa Department of the Interior and Local Government (DILG) nga posibleng mosangpot sa kapintasan ang operasyon sa pagsikop.
Bisan pa niana, gipasiugda ni Gatchalian nga kinahanglang barugan sa kagamhanan ang mga otoridad niini atubangan sa mga taho nga dunay armadong grupo nga matud pa nag-atiman kang Dela Rosa. (raniel mahunyag)
