Usec. Castro, gipamugos nga premature ang hisgutanan sa paghulip kang VP Sara

Gipamugos ni Palace Press Officer Undersecretary Claire Castro nga sayo pa kaayo aron hisgutan ang posibleng paghulip kang Vice President Sara Duterte kon ugaling ma-impeach kini.

Gihatagan og gibug-aton ni Castro nga angay nga tahuron ang buhatan sa Bise Presidente samtang nagpadayon pa ang impeachment proceedings.

Matud ni Castro, wala pa mahuman ang trial busa angay lang nga tugotang mo-uswag ang proseso ug mahatagan ang Bise Presidente og due process.

Gitawag usab ni Castro nga premature ang pahayag ni Senador Alan Cayetano bahin sa maong hisgutanan ug miingon kini nga walay bisan kinsa ang angay nga mag-diktar sa kung unsa ang gusto ni Presidente Ferdinand Marcos Jr.

Sa kasamtangan, gipasiugda sa Malacañang ang kamahinungdanon sa pagtahod sa proseso ug paghulat sa mahimong resulta sa impeachment trial ayha hisgutan ang posibleng paghulip sa Bise Presidente. (raniel mahunyag)