Giila nga ‘red flag’ sa People’s Budget Coalition ang gipakita sa Senado nga kapin sa 1 trilyon pesos nga kantidad sa alokasyon sa sugyot nga 2027 national Budget.
Atol sa pagdungog sa Senate Finance Committee kauban ang mga Civil Society Organizations, gipadayag ni coalition co-convenor AJ Montesa nga lakip niini ang 210 bilyon pesos nga soft pork, 695 bilyon pesos nga hard pork, ug 112 bilyon pesos nga shadow pork o unprogrammed appropriations.
Gilambigit sa grupo ang soft pork sa mga hinabang nga matud pa nakadepende sa patronage, samtang ang hard pork kay ang mga proyektong pang-imprastraktura nga matud pa mahimong maimpluwensiyahan sa mga pulitiko.
Matud ni Montessa, nagdala og kabalaka ang maong alokasyon tungod kay mamahimong mas mapaboran ang interes sa mga pulitiko inay nga ang panginahanglan sa publiko.
Dugtong niini, gisugyot sa People’s Budget Coalition ang mga reporma sa sistema sa hinabang aron nga mas direktang mapahimuslan sa katawhan ang pondo sa kagamhanan.
Lakip niini ang pagbalhin sa pondo gikan sa Medical Assistance for Indigent and Financially Incapacitated Patients (MAIFIP) ngadto sa PhilHealth, gikan sa Tulong Dunong padulong sa Tertiary Education Subsidy, ug gikan sa Assistance to Individuals in Crisis Situation (AICS) padulong sa Pantawid Pamilyang Pilipino Program (4Ps).
Gisugyot usab sa grupo nga wagtangon na ang guarantee ug referral letter system sa pagkuha og medical assistance ug itugyan na lamang ngadto sa hingtungdan nga ahensya o hospital social services ang pag-isyu sa mga gikinahanglang dokumento.
Gihangyo usab nila ang klaro nga processing time ug priority lanes alang sa mga emerhensya nga dunay kalabotan sa pagpatambal ug pagpalubong. (raniel mahunyag)
.jpg "Usec. Castro, gipamugos nga premature ang hisgutanan sa paghulip kang VP Sara")
