Gipalig-on sa Philippine National Police (PNP) ang operasyon sa pagpangita ug pagdakop kang Senador Ronald “Bato” Dela Rosa subay sa direktiba nga pahugtan ang manhunt batok kaniya.
Sumala ni PCol. Allen Rae Co, hepe sa PNP Public Information Office, nagtukod ang kapulisan sa mga “dedicated tracker teams” aron tutokan ang pagpangita sa senador.
Gipalihok usab sa PNP ang tibuok pwersa niini aron madala si Dela Rosa ngadto sa proseso sa balaod ug matubag ang giatubang nga mga kaso.
Gitugotan sa kapulisan ang usa ka semana nga lugay alang sa boluntaryong pagsurender isip timaan sa maayong kabubut-on ug aron mahatagan siya sa higayon nga resolbahon ang sitwasyon nga adunay dignidad.
Gibutyag ni Co nga mas gipili sa PNP ang malinawon nga resolusyon samtang nagpadayon ang ilang mga operasyon sa pagpatuman sa balaod. Sa kasamtangan ang senador gipatungan sa P15-Milyon reward money sa DILG alang sa mga informats sa iyang lokasyon.
