Gipamugos ni Palace Press Officer Atty Claire Castro nga katungdanan sa Philippine National Police (PNP) ang pagpatuman sa balaod ug pagsunod sa mga legal nga mando subay sa gilatid sa Konstitusyon.
Sa press briefing sa Malacanang, gitubag niini ang mga pangutana mahitungod sa posibilidad nga maapektuhan sa personal nga relasyon ang pagpatuman sa warrant batok kang Ronald “Bato” dela Rosa, ilabina nga pareho silang alumni ni PNP Chief General Nartatez Jr. sa Philippine Military Academy (PMA).
Giklaro sa Palasyo nga dili angay mahimong babag ang kaniadtong posisyon ni Dela Rosa isip kanhing PNP Chief o ang ilang panag-uban sa PMA sa pagpatuman sa usa ka balidong warrant of arrest.
Gisaligan usab sa administrasyon nga unahon ni General Nartatez Jr. ang iyang panumpa ug katungdanan ngadto sa Republika labaw sa bisan unsang personal nga panaghigalaay o kaalyado.
Gihagit ni Castro ang pamunuan sa DILG ug PNP nga pamatud-an ang ilang kapasidad sa pagpatuman sa balaod ug pagtuman sa ilang mandato isip mga tigpatuman sa hustisya.
.jpg "PBBM nagpabiling taas ang pagsalig sa PNP sa pag-aresto kang Sen Dela Rosa")
