PBBM nagpabiling taas ang pagsalig sa PNP sa pag-aresto kang Sen Dela Rosa

Mitin-aw si Atty Claire Castro, Palace Press Officer sa Malacañang, nga wala magpakita sa pagkadismaya ug wala nawad-an sa pasesya si Pangulong Ferdinand Marcos Jr. bisan wala pa madakpi hangtod karon si Ronald “Bato” dela Rosa.

Gipasalig ni Casreo nga nagpabiling adunay bug-os nga pagsalig ang Presidente sa Philippine National Police (PNP) ug sa Department of the Interior and Local Government (DILG) samtang gipatuman nila ang ilang mga katungdanan.

Gipamugos sa Palasyo nga gihatagan gihapon sa kahigayonan ang mga awtoridad sa pagpahigayon sa ilang operasyon subay sa balaod ug sa hustong proseso.

Gipasidan-an usab ni Castro nga mahimong seryoso nga isyu kon mapamatud-an nga adunay mga pulis nga nagtabang o naghatag og panalipod aron malikayan ang pagdakop sa senador.

Gipatuman sa administrasyon ang baruganan nga walay bisan kinsa nga dapat molabaw sa balaod ug ang tanang alegasyon pagasusihon sa tukmang paagi kon adunay lig-on nga ebidensiya.