Gikuwestiyon ni House prosecutor Atty. Terry Ridon ang lapad nga pagsupak sa depensa ni Vice President Sara Duterte sa tanang documentary evidence nga gipresentar sa House prosecution may kalabotan sa alegasyong “unexplained wealth”.
Matud ni Ridon, apil sa gisupak sa depensa ang tanang Statements of Assets, Liabilities and Net Worth (SALN), mga bank records, insurance documents, ug mga rekord gikan sa Bureau of Internal Revenue (BIR) ug Anti-Money Laundering Council (AMLC).
Ang prosecutor usab miingon nga makapatingala ang maong blanket objection tungod kay ang mga abogado mismo ni Vice President Sara Duterte miapil sa pagdungog sa kaso ug mi-cross examine sa mga testigo nga mipamatood sa maong mga dokumento.
Hinoon, nagpabiling masaligon ang mambabalaod nga dili pagahatagan og bili sa Senate Impeachment Court ang kinatibuk-ang pagsupak sa depensa batok sa tanang ebidensiya nga gipresentar sa prosekusyon.
Ang mga senator-judges gihapon ang adunay katungod sa pagdesisyon kung unsang mga dokumento ang dawaton isip ebidensiya sa maong kaso.
Gilauman nga magpadayon ang impeachment trial sa Nobyembre 9, diin andam usab ang prosecution sa pag-cross examine sa mga testigo nga ipresentar sa depensa.
