Moabot sa 172,654 nga mga bag-ong laptops nga nagkantidad og 7.4 bilyon pesos ang gikatakdang ipang-apod-apod sa Department of Education ngadto sa mga public school teachers ug administrative personnel.
Ang pagpalit og mga laptops sa departamento kay bahin sa lakang sa kagamhanan aron andamon ang mga magtutudlo sa paggamit og digital tools, diin gikatakdang ipang-apod-apod kini gikan sa bulan sa Nobyembre hangtud sa Marso sa sunod nga tuig.
Sumala sa DepEd, napalit ang matag gadgets sa kantidad nga 43,000 pesos lamang, unom ka libo nga mas ubos kung itandi sa suggested retail price sa model nga 49,000 pesos per unit sa Pilipinas.
Lakip na usab sa package ang lima ka tuig nga warranty nga mas taas kung itandi sa standard one-year retail warranty niini.
Lakip usab sa laptop ang built-in productivity tools, delivery, ug logistics.
Maghatag usab ang DepEd og 3,646 units sa mga administrative officer sa matag tunghaan.
Dugtong niini, nalig-alayon na usab ang DepEd ngadto sa pipila ka advance technological company aron mahatagan og formal training ang mga magtutudlo sa pagpakusog sa paggamit og teknolohiya sa pagtudlo. (raniel mahunyag)
