Posibleng moabot sa gibana-banang duha ka tuig o sobra pa ang trial ni kanhi Presidente Rodrigo Duterte sa International Criminal Court (ICC).
Ang maong trial kay gikatakdang sugdan karong umaabot nga Nobyembre 30, kapin sa 20 ka bulan gikan sa pagsikop sa kanhi Presidente sa Pilipinas.
Matud ni ICC-accredited lawyer, Atty. Gilbert Andres, mamahimo pang mapamubo o mas mapataas ang trial depende sa dagan sa pagdungog ug sa kapaspas sa pagpresenta sa mga testigo ug sa mga ebidensyang giandam sa duha ka panig.
Dugang pa ni Atty. Andres, mahinungdanon ang nahimong desisyon sa korte nga obligahon ang kanhi Presidente nga moatubang mismo sa maong trial.
Gilauman usab nga pipila ka kabanay sa mga biktima nga personal nga mosubaybay sa mga serye sa pagdungog sa The Hague, ang headquarters sa ICC.
Mipahayag usab ang abogado nga usa lamang ka matang sa international crime ang giatubang sa kanhi Presidente hinungdan nga mas simple ang maong kaso kung itandi sa uban pang mga kaso nga nahawiran na kaniadto sa international tribunal. (raniel mahunyag)
