Niubos og 5 porsiyento ang kantidad sa produksiyon sa agrikultura ug pangisda sa Pilipinas ngadto sa 389.42 bilyon pesos sa ikatulong kwarter sa tuig sa 2026, kung itandi sa samang panahon niadtong 2025, sumala sa Philippine Statistics Authority (PSA).
Ang maong pagkunhod naggikan sa 9.3 porsiyentong pag-us-os sa produksiyon sa mga tanom, lakip ang humay ug mais nga mikunhod og 17.8 porsiyento ug 17.4 porsiyento ang matag usa, ingon man sa 8.5 porsiyentong pagkunhod sa pangisda.
Sa laing bahin, mitubo og 1.1 porsiyento ang produksiyon sa kahayupan ug 4.9 porsiyento ang manokan, nga nakatabang sa pagpamenos sa epekto sa pagkunhod sa ubang subsekto
Sumala sa Department of Agriculture, nalambigit sa maong pagkunhod ang dili maayong kahimtang sa panahon, lakip ang pagbaha tungod sa Habagat, ug ang pagsaka sa presyo sa abono ug uban pang panginahanglanon sa pag-uma. (raniel mahunyag)
