Gipahamtangan sa University Athletic Association of the Philippines (UAAP) og duha ka duwa nga suspensiyon si Ateneo de Manila University head coach Louie Alas tungod sa natigom niyang mga paglapas sa lagda ug dili maayong pamatasan atol ug human sa ilang duwa batok sa University of the Philippines (UP) niadtong Sabado, Nobyembre 7, diin napildi ang Ateneo sa iskor nga 82-74.
Ang usa ka duwa nga suspensiyon tungod sa duha ka infraction nga iyang nahimo sa duwa batok sa UP ug University of Santo Tomas (UST), lakip na ang iyang pagsulod sa court aron moreklamo sa wala pagtawag og foul ug ang pagsamok sa tira ni UST player Amiel Acido niadtong Oktubre 17.
Samtang, ang ikaduhang duwa nga suspensiyon gipahamtang tungod sa iyang pagsulod pag-usab sa court, pagtudlo ug pagbalikas kang UP player Jacob Bayla human sa dunk niini sa katapusang segundo sa duwa, ingon man sa iyang pakiglalis sa assistant coach sa UP nga si Christian Luanzon.
Tungod niini, dili makalingkod isip head coach si Alas sa sunod nga mga duwa sa Ateneo batok sa Adamson University karong Nobyembre 11 ug UST karong Nobyembre 15, bisan pa nga gitugotan ang unibersidad nga moapelar sa maong desisyon. (raniel mahunyag)
