Gipangunahan ni Ma. Cristina Roque, kalihim sa Department of Trade and Industry (DTI), ang ika-28 nga ASEAN Economic Community Council Meeting isip kabahin sa mga preparatoryong kalihokan alang sa ika-49 nga ASEAN Summit sa Manila.
Ang maong tigum nagtumong sa pag-apruba ug pagpalambo sa mga inisyatibong ekonomikanhon nga gipasiugdahan sa Pilipinas isip Chair sa ASEAN. Gipalig-on sa mga economic ministers ang mga prayoridad nga economic deliverables sa Pilipinas, lakip ang pagduso sa ASEAN Digital Economy Framework Agreement (DEFA).
Ang kasabutan gitumong sa pagpalambo sa digital trade, e-commerce, electronic payments, ug cybersecurity sa tibuok rehiyon sa ASEAN.
Gihuman usab sa mga ministro ang mga rekomendasyon ug programang ekonomikanhon nga isumite ngadto sa mga lider sa ASEAN alang sa ilang konsiderasyon sa summit.
Matod ni Roque, importante nga adunay klarong mga target ug episyenteng implementasyon aron masiguro nga ang mga programa makahatag og kaayohan sa negosyo, mamumuo, ug mga komunidad.
Gilauman nga ang mga resulta sa maong tigum mahimong kabahin sa opisyal nga panaghisgotan sa mga lider sa ASEAN atol sa ika-49 nga ASEAN Summit, diin hisgutan ang mga hagit ug oportunidad alang sa mas lawom nga integrasyon sa ekonomiya sa rehiyon.
