Gikwestyon sa pundok sa Anakbayan Southern Mindanao Region ang tinuod nga tumong sa gihulagway nga kalamboan sa proyektong Pax Silica tungod kay kinahanglan pang palayason ang mga lumad ug mga mag uuma gikan sa ilang yutang kabilin aron lamang kini matukod.

Gipadayag ni Anakbayan Southern Mindanao Chairperson Fauzhea Guiani nga kadaghanan sa mga lugar nga maligsan sa maong proyekto mga yutang pang agrikultura ug ancestral lands sa mga lumad sama sa mga Aeta.

Gipunting ni Guiani nga nagpakita lamang kini sa kakuwang og pagtagad sa gobyerno tungod kay hangtod karon wala pay klarong plano kon asa ipamutang ang mga apektadong residente sa higayon nga sugdan na ang pagtukod sa pasilidad.

Matud sa lider sa grupo, ang tinuod ug insaktong lakang nga angay himuon sa gobyerno mao ang pag apod apod sa yuta ngadto sa mga mag uuma ug mga lumad aron sila mismo ang makapahimulos niini imbes nga isakripisyo alang sa mga langyaw nga negosyante.