Sikop sa gipahigayong drug buy bust operation sa kapulisan ang duha ka suspetsado lakip na ang usa ka bag-ong nailhang high value individual human nakuhaan og kapin 5.5 milyones pesos nga kantidad sa gituohang shabu sa Barangay Natumolan, Tagoloan, Misamis Oriental.

Giila ang mga dinakpan nga sila alyas Jerson, 28 anyos nga lalaki ug giilang high value individual, ug alyas Maricar, 19 anyos nga babaye ug street level individual nga pulos residente sa maong lugar.

Nakuha gikan sa posisyon sa mga suspek atol sa operasyon sa Tagoloan Municipal Police Station uban sa uban pang yunit sa kapulisan ang 53 ka pakete sa gituohang shabu nga mitimbang og 820 gramos ug mibalor sa 5,576,000 pesos lakip na ang 1,000 pesos nga buy bust money.

Gumikan niini, gidayeg ni Police Regional Office 10 Regional Director Police Brigadier General Nestor Babagay Jr ang malampusong operasyon ug gimandoan an mga kapulisan nga ipadayon ang hugot nga kampanya batok sa ilegal nga droga samtang gipasakaan na og kasong pagsupak sa Republic Act 9165 ang mga suspek.