Padayon ang pagpanawagan sa Alliance of Concerned Teachers (ACT) alang sa ₱50,000 nga entry-level salary para sa mga magtutudlo sa nasud.
Namahayag si Ruby Bernardo sa ACT Philippines nga samtang daghang bag-ong polisiya alang sa umaabot nga school year ang ginaduso, wala gihapon matagad ang dugay nang hangyo sa mga magtutudlo alang sa patas nga pagtaas sa suhol.
Iyang gipadayag nga sa miaging mga tuig, halos parehas ra kaniadto ang kita sa mga teachers, nurses, pulis ug sundalo.
Apan karon, mas taas na ang salary grade sa uban samtang ang mga magtutudlo nagpabiling ubos ug nag-atubang pa sa daghang personal nga gasto sa eskwelahan.
Dugang pa niya, kasamtangan nga kapin ₱31,000 ang sweldo sa entry-level teacher apan adunay mga kaltas ug dugang obligasyon sa trabaho.
Gawas niini, nanawagan usab ang grupo nga ipataas ang Personnel Economic Relief Allowance gikan sa ₱2,000 ngadto sa ₱5,000 human napabilin kini sa maong kantidad sulod sa daghang tuig.
Busa naglaom ang ACT nga dunggon sa kagamhanan ang ilang panawagan alang sa mas makiangayon nga kahimtang sa mga magtutudlo.
