CAGAYAN DE ORO CITY-Gibulgar sa Joint Task Force-Ranao nga anaa sa 200 ka child warriors nga miyembro sa Daesh-ISIS ang kasamtangang nagbansay-bansay aron makig-engkwentro sa gobyerno sa Lanao del Sur.
Si Joint Task Force Ranao deputy commander Col Romeo Brawner miingon nga una nang na-engkwentro sa militar ang maong ihap sa dihang ilang gisulong ang duha ka hideouts sa mga terorista sa Masiu ug Pagawayan sa maong lalawigan.
Nasuta usab nga nagpadayon sa recruitment ang mga terorista aron madugangan ang ihap sa ilang mga miyembro.
Gibutyag usab ni Brawner nga adunay foriegn terrorists silang gibantayan sa Lanao del Sur.
Matud ni Brawner nga dako ang iyang pagtoo nga mga kanhi miyembro sa Maute-ISIS ang mga langyaw kinsa dugay na nga gipangita sa mga otoridad.
Kini ang hinungdan nga mas gipahugtan pa nila ang ilang intelligence monitoring ug gathering.
Dugtong pa ni Brawner nga anaa na sa 35% sa main battle area sa Marawi City ang ilang nahuman sa gihimong clearing operation sa mga improvised explosive device.
Matud pa hapit na nila mahuman ang katunga sa paglimpyo sa main battle field.
Gipahimangnuan usab ni Brawner ang mga residente nga dili mahadlok kun ugaling adunay boto nga madunggan gikan sa battle field tungod kay mga bomba kini nga ilang gipabusikad.
