CAGAYAN DE ORO CITY – Napatay sa hiniusang operasyon sa militar ug kapolisan ang usa ka alyas Fighter ug apil usab sa nakalas ang lima ka bulan nga batang babaye ingon man samaron si Norhannah Aba sa Sitio Lusong,Brgy Dalimbayan,Maguing,Lanao del Sur.
Miingon si Police Lt Mohammad Hazem Amaikurut sa Maguing Police Station nga naghimo sa clearing operation ang tropa sa militar sa pagpangulo ni Army 1Lt Ed Dominick Postrano sa dihang gipaulanan sila sa mga bala gikan sa grupo ni Alyas Fighter.
Natigayon ang pagsinukliay sa mga bala nga nag-resulta sa kamatayon ni Alyas Figther apan nadamay ang lima ka bulan nga bata nga si Princess Sophia ug Norhannah.
Narekober sa lokasyon ni Alyas Fighter ang duha ka tag-as nga kalibre sa armas samtang nakasibat usab ang mga kauban niini.
Gikugod pa sa mga militar ug kapolisan ang mga naka-eskapo nga mga armadong kauban ni alyas Fighter.
