CAGAYAN DE ORO CITY – Gilayong naglugwa abiso ang City Local Environment and Natural Resources o CLENRO nga likayan ang pagdalikyat ug pagsulod sa bag-ong diskobre nga langob sa Sitio Sta Cruz,Brgy Dansolihon ning syudad.
Kini human unang natultulan sa pipila ka residente ang maong langob dihang dunay gilusad nga pagpaluag sa dalan ang kontraktor sa tulay nga makit-an sa lugar.
Gihimo ni CLENRO manager Engr Armen Cuenca ang dinaliang pasidaan dihang nag-trending ang maong langob nga sumala sa kapsyon nga nagkupot sa nindot nga palibot ug naghatag sa mensahe nga makadani sa mga residente nga modalikyat niini.
Siya miingon nga angay dili una tandugon ang langob ug ang mga bisan unsa nga makitang mga ebedensiya kay dunay balaod nga nagpanalipod niini.
Pagpasabot ni Cuenca nga subay sa nalatid sa RA 9072 of 2001 (National Caves and Cave Resources Management and Protection Act) ug RA 9147 o “An Act providing for the conservation and protection of wildlife resources and their habitats”,kini nagpasidaan nga:1.puy-anan sa wildlife o kalasanon busa,protektado sa balaod 2.nag-deklara na ang mga langub ug ang mga gikan sa langub mga bahandi sa kinaiyahan sa nasud 3.ginadili ang pagpahibalo kabahin sa lokasyon sa langub sa sulod sa usa ka tuig gikan sa iyang pagka-sayre sa DENR diin dapita nahimutang samtang wala pa kini ma-klasipikar kon maduaw sa turismo o pagatun-an pa sa mga eksperto ug daghan pang uban.
Mipasidaan usab kini ngadto sa mga tawong makasupak sa maong mga balaod nga mag-atubang sa pagka-priso sa duha hangtod unom ka tuig ug dunay 20-mil ngadto 500-mil pesos kon mapamatud-an sa korte.
Dili usab luwas kadtong mga tawong utok sa pagguba ug paghaw-as sa mga natural nga rekurso kay sila mapriso gihapon sa unom hangtod walo ka tuig ug multa 500-mil ngadto uno milyones pesos depende sa hukom sa korte.(CLENRO inputs).
