CAGAYAN DE ORO CITY – Patay ang usa ka barangay kagawad human gipusil-patay sa wala mailang suspek sa may Clarin, Misamis Occidental.
Giila ni Police Captain Locino Lavares, hepe sa Clarin Municipal Police Station ang biktima nga si Ric Isidro Comonsad Moreno, residente sa Purok 6, Barangay Poblacion 1 sa maong lugar.
Matud ni Capt Lavares, gipusil ang biktima human siya mibotar sa Antero Uy Elementary School.
Gidala pa sa balay-tambalanan si Moreno apan gideklara kini sa mga doktor nga dead on arrival.
Narekober sa crime scene ang tulo ka empty shell sa .45 caliber pistol.
Giimbestigahan karon sa kapulisan ang posibilidad nga may kalabutan sa pulitika ang motibo sa pagpamusil.
