Gisugdan na ang pagpamaligya sa mas baratong karneng baboy sa pinili nga Kadiwa Stores sa Metro Manila, Metro Cebu, ug Metro Davao.
Namahayag si DA Secretary Francisco Tiu Laurel Jr. nga ang mas ubos ang presyo sa ilang karneng baboy kay resulta kini sa pagkunhod sa gasto sa logistics ug middlemen, pinaagi sa tabang sa Food Terminal Inc. (FTI).
Sa kasamtangan, ang presyo sa liempo sa merkado mapalit sa P450-P490 kada kilo, apan sa Kadiwa Stores, kini ibaligya ra kini sa tag P350-P380 kada kilo.
Gisiguro sa DA nga ang programa makatabang sa mga konsumidor, ilabi na sa mga minimum wage earners, aron makapalit sila sa presko ug mas barato nga baboy.
Gibantayan usab sa DA ang pagpangilad sa mga tindero, diin ang barato nga imported nga karne gibutangan sa presyo sama sa mahal nga lokal nga baboy.
Nagpahimangno ang ahensya nga ilang palig-onon ang regulasyon aron masiguro nga tinuod nga lokal ug imported nga baboy ang ibaligya sa hustong presyo.
Laraw sa DA nga magpatuman sa maximum suggested retail price (MSRP) alang sa imported ug frozen pork, aron malikayan ang overpricing ug pagpangilad sa merkado.
