CAGAYAN DE ORO CITY – (update) Gisaad sa Verde Soko Philippines Industrial Incorporated nga mabalik sa South Korea ang mga basura nga kasamtangang gitanggong sulod sa PHIVIDEC Industrial Authority.
Namahayag si Mindanao International Container Terminal port collector John Simon sa Bombo Radyo nga gihulatan pa nila ang kompanya nga mag-comply sa rekisitos nga mupalit sa makina nga maoy moputos ug mo-selyo sa mokabat 5,000 tonelada nga nabiling basura.
Una niini, gisugyot ni Simon sa Verde Soko nga mu-arkila sila’g chartered vessel nga walay laing ikarga kon dili ang mokabat 5,000 ka bulsita nga puno sa basura.
Gisiguro usab ni Simon nga ma-monitor ang ruta sa barko tungod kay taas ang posibilidad nga mahimo kining ilabog sa lawod ug sutaon kungng tinood ba kining midunggo sa Peongtek, South Korea ang gi-arkila nga barko.
Sa kasamtangan ang Verde Soko gipasak-ag kaso sa NBI human nalapas ang Customs Modernization and Tariff Act (RA 10863) ug ang Toxic and Hazardous Waste Act.
Kung mahinumduman, gideklarar sa BoC kuyog sa DENR-EMB nga ang duha ka shipment sa kompanya nga “Plastic Synthetic Flakes” nasuta nga makadaut sa kinaiyahan ug panglawas sa tawo.
