Nadiskobrehan ni Senate Blue Ribbon Committee Chairman Rodante Marcoleta nga walay Koordinasyon sa River Basin Control Office ug Department of Public Works and Highways (DPWH). Mi-angkon si Secretary Manuel Bonoan nga aduna silay kakulang sa impormasyon bahin sa tahas sa maong opisina. Gumikan niini, gilekturan ni Marcoleta si Bonoan nga kini nga opisina ang “Missing Link” ug tubag sa tanan sulidad sa pagbaha sa Pilipinas.
Ilawom sa Executive Order No. 510 nga gipirmahan ni kanhi Presidente Gloria Macapagal-Arroyo niadtong 2006, gimugna ang River Basin Control Office (RBCO) ubos sa Department of Environment and Natural Resources (DENR) aron magdumala sa mga proyekto sa flood control ug reforestation sa watershed areas. Gisundan kini sa Executive Order No. 816 niadtong 2009, nga nagdeklarar sa RBCO isip lead agency sa integrated planning ug development sa mga river basins sa nasud. Apan sa bag-ong budget deliberation, miangkon si DPWH Secretary Manuel Bonoan nga wala siya kasayod sa RBCO ug wala silay koordinasyon sa maong opisina. Kini nga pahayag nagpakita sa kakulang sa inter-agency collaboration sa mga proyekto nga kritikal sa paglikay sa pagbaha.
Gibutyag ni Bonoan nga ang DPWH nagbantay sa 18 ka major river basins sa Pilipinas ug didto nila gi-instalar ang mga flood control projects. Apan ang kakulang sa koordinasyon tali sa DPWH ug RBCO nagdala sa daghang kapalpakan sa epektibong implementasyon sa mga proyekto. Hisayran nga tataw nga gimando sa EO 510 ug EO 816 nga ang RBCO ug DPWH magtinabangay sa pagplano ug pagpatuman sa mga proyekto sa baha, lakip na ang Pasig River Rehabilitation, KAMANAVA Flood Control, ug Agno River Flood Control. Ang pag-angkon ni Bonoan nga wala siya masayud sa RBCO nagpasabot nga ang mandato sa EO wala natuman sa aktwal nga operasyon.
Gumikan niini, gi-obligar ni Marcoleta ang panginahanglan sa mas hugot nga koordinasyon ug transparensiya sa mga ahensya sa gobyerno. Nagtoo ang senador nga kung ang DPWH ug RBCO magpadayon sa ilang nagkalain-lain nga direksyon, ang epekto sa mga proyekto sa baha mahimong limitado ug sayang ang bilyon-bilyong pondo nga gigahin. Gitin-aw ni Marcoleta nga ang mga river basin projects dili lang teknikal nga trabaho, apan usa ka inter-agency nga paningkamot nga nagkinahanglan sa klarong komunikasyon ug kolaborasyon. Ang kasayuran nga wala mahibaloan sa DPWH Secretary, nagpakitag alarma, alang sa senador ug timailhan sa kahuyang sa sistema sa pagdumala sa natural resources ug disaster mitigation.
