Na-establishar na ang lig-on nga koordinasyon sa Business Sector tali sa Intelligence Community sa syudad.
Gibutyag kini ni Engr. Alarico Brito, presidente sa Cagayan de Oro Chamber of Commerce and Industry, Inc. (Oro Chamber), human sila mi-entra sa Memorandum of Understanding (MoU) tali sa Task Force Oro ug sa National Intelligence Coordinating Agency (NICA) nga nakabase sa Kamp Evangelista, ning syudad.
Sa bag-uhay lang nahuman nga committee meeting sa Peace, Security and Development, miingon si Engr. Brito nga gawas sa ilang gihatag nga pagsalig sa kapulisan, ila usab gikutay ang lig-on nga koordinasyon sa kasundaluan batok sa mga Communist Terrorist Group o CTG members nga sagad mangilkil sa ilang mga kaubanan sa negosyo, ilabi na panahon sa Pasko ug selebrasyon sa Bag-ong Tuig.
Dugtong niini, mi-apelar si Engr Brito sa ilang kapin 400 ka mga miyembro sa Micro-Small, and Medium Enterprises (MSME’s) nga kinahanglan manigurado usab sila sa pagbantay sa ilang mga patigayon sama sa pagbutang sa CCTV Camera, ug pag-hire sa mga sekyu, aron dili makalusot ang mga dautang elemento.
