CAGAYAN DE ORO CITY-Giuyunan ni Cagayan de Oro Archdiocese consultor Msgr Rey Manuel Monsanto nga i-uban sila sa paglusad sa Oplan Tokhang Version 2 ngadto sa kabalayan diin may mga miembro sa pamilya nga nalambigit pagbaligya ug paggamit sa ilegal nga droga sama sa shabu.
Kini human gibutyag ni PNP chief Dir Gen Ronald de la Rosa nga kuyugan nila ang gikan sa relihiyosong sektor ingon man ang barangay opisyales sa paghangyo sa suspected drug pushers ug users.
Gibutyag ni Monsanto nga personal lamang niya nga opinyon ang pag-uyon kabahin sa panawagan ni De la Rosa.
Apan gibutyag sa pari nga hulaton usab nila ang baruganan ni CdeO Archbishop Antonio Ledesma kabahin sa hangyo sa PNP ilabina nga wala sa iyang posisyon ang paghatag tubag sa katibuk-an gikan sa simbahan.
Giawhag usab ni Monsanto ang PNP nga ilakip ang pag-imbitar ang ubang relihiyon ug taga Commission on Human Rights o CHR aron mas mohayag ang ilusad anti-illegal drugs campaign sa gobierno.
Una nang gibutyag ni Monsanto nga pabilin ang baruganan sa simbahan nga supak sa extra judicial killings nga nanghitabo sa bisan asa nga bahin sa Pilipinas.
