(Update) CAGAYAN DE ORO CITY-Naglaraw si RTC Branch 25 Presiding Judge Arthur Abudiente nga pasaka’ag kasong ‘graft and corruption’ sa Ombudsman ang kadagkuan sa DPWH Region 10.
Kini tungod sa pagkadaut sa ilang gitrabaho nga tulay diha sa Igpit, Opol, Misamis Oriental nga nakahatag grabeng perwisyo ngadto sa publiko.
Matud ni Abudiente nga dili lamang pag-usik-usik sa kwarta sa gobyerno ang gihimo sa DPWH-10 kundili usa kini ka klarong pagpangurakot.
Dugang ni Abudiente nga iya nang gisulatan si Pres. Rodrigo Duterte bahin sa anomalosong proyekto sa DPWH nga gitrabaho sa UKC builders.
Gikompirmar ni DPWH spokesperson Vinah Jean Maghinay nga mihimog imbestigasyon ang ilang project engineers bahin sa pagkahugmak sa approach sa tulay nga gitrabaho sa UKC builders diha sa Igpit, Opol ning lalawigan.
Ilang gihimo ang imbestigasyon tungod sa perwisyo nga gihatag niini ngadto sa publiko.Gibutyag ni Maghinay nga nangandam usab karon ang ilang mga enhenyero alang sa ilang paghatag katin-awan ngadto sa ilang main office sa kauluhan.
Apan miingon si Maghinay nga wala pa siya’y kasayuran bahin sa planong pasaka-an sila’g kaso sa Ombudsman.
