Dobli-tripli nga seguridad ang gipatuman sa business sector sa lungsod sa Cagayan de Oro, samtang nagkaduol ang Holiday rush.
Kini ang gibutyag ni Engr. Almarico Brito, presidente sa Oro Chamber of Commerce tungod sa dakung hulga sa mga kawatan ug uban pang dautang elemento sama sa Communist Terrorist Group (CTG) nga posibleng mu-atake sa ilang mga patigayon.
Gisugilon ni Engr Brito sa Bombo Radyo nga natapok na sila sa Cagayan de Oro City Police Office (COCPO) ug nagpadumdum nga magbutang sa ilang kaugalingong mga sekyu, bantay sa mga stall kuyog ang pagmuntar sa mga CCTV Camera aron dali madakpan ang mga musulay sa pagpangawat o mangilkil nga mga nagpailang CTG.
Hisayran nga dili malikayan nga mapuno ug mag-guot ang mga dagkung malls ug grocery stores ilabe na kung dool na ang Pasko ug Bag-ong Tuig tungod sa ipatumang mga sale ug discounted nga mga baligya.
Una niini, gibutyag ni Konsehal Roger Abaday, chairman sa Committee on Police, Fire and Public Safety, sa Bombo Radyo, nga adunay nadawat nga impormasyon ang City-LGU kalabot sa CTG Threat nga buot muguba sa kalinaw sa syudad panahon sa paskuhan.
Hinoon, dugay nang gipasalig sa Cagayan de Oro City Police Office (COCPO) nga aduna silay mga roving policemen ug mga nagbantay nga mga pulis duol sa mga malls ug dagkung mga grocery outlets.
