CAGAYAN DE ORO CITY-Gusto sa tulo ka komitiba sa konseho nga masiguro nga mawad-ag bili ang kontrata nga gisudlan sa Cagayan de Oro Water District o COWD sa Rio Verde Water Consortium Inc o RVWCI ingon man joint venture sa MetroPac Water Investments Corporation.
Kini human gika-alarma sa konseho ang bahad sa Rio Verde nga minusan ang water demand kon dili ihatag ang 16 pesos ug 35 sentabos nga usbaw sa presyo sa tubig sa COWD.
Gibutyag ni Kag Bong Lao,chairman sa public utilities committee sa konseho nga kini ang hinungdan miduso sila’g petisyon aron hataga’g legal personality sa termination of contract case sa COWD ug Rio Verde sa korte.
Gihimo sa COWD ang pagpa-nullify sa Rio Verde tungod sa disallowance sa Commission on Audit diin nakig-joint venture sila sa MetroPac isip bag-ong tig-suplay sa tubig sa syudad sugod tuig 2018.
Samtang wala’y pagsupak ang COWD sa gihimong petisyon sa tulo ka komitiba sa konseho aron moapil sa termination of contract case tali Rio Verde sa korte.
Kini human gitakdang subli dunggon sa korte ang compromise agreement sa COWD ug Rio Verde sa Disyembre 4 ning tuiga.
Miingon si COWD General Manager Engr Rachel Beja nga katungod sa konseho ang paghatag protection sa interes sa publiko.
Giklaro usab ni Beja nga ang ilang pagpakig-kontrata usab sa Metro Pacific Water Investment Corportation ang paagi nga dili mapihig sa serbisyo ang katawhan kon dili na supplier sa tubig ang Rio Verde sa syudad.
