CAGAYAN DE ORO CITY- Gipasalig sa Cagayan de Oro City Police Office o COCPO nga dili makaapekto sa ilang trabaho sa pagmintinar sa kalinaw sa ang kamatayon ni City Police Director Police Col Nelson Aganon ning syudad.
Gibutyag ni COCPO officer-in-charge Police Lt Col Reynante Reyes nga ilang gikakurat ug gikasubo ang kamatayon ni Aganon samtang na-coma sulod sa intensive care unit sa Polymedic Medical Plaza ning syudad kagahapon sa hapon.
Siya miingon nga kinse ka higayon nga gisulayan pag-revive sa mga doktor ang kinabuhi ni Aganon apan napakyas sila.
Kahinumduman nga gipaubos sa operasyon si Aganon human maaksidente sa usa ka motorcycle course diin nakaangkon kini’g blood clot sa iyang ulo.
Si Aganon miembro sa PNPA Class 1994 diin nadestino sa Special Action Force o SAP sa PNP sa Luzon,commander sa Regional Mobile Force Batallion sa PNP-ARMM ug Northern Mindanao ayha nahimong city police dircetor ning syudad.
Samtang nakahaya na si Aganon sa Cosmopolitan Funeral Homes sa Capistrano ning syudad.
Kini human mahukmi sa pamilya ni Aganon ug sa COCPO nga mahatagan sa higayon ang kapolisan ug ang publiko nga masud-on sa katapusang higayon sa dili pa dad-on sa iyang hometown didto sa Nueva Ecija aron didto ilubong.
Miingon si Reyes nga duha ka adlaw ug usa ka gabii nga ihaya si Aganon sa syudad ayha ibiyahe padulong sa pamilya niini didto sa Luzon.
Namahayag si Reyes nga ilang ihatag kang Aganon ang katapusang serbisyo sa pagplastar sa patay’ng lawas niini nga nakahaya sa Cosmopolitan Funeral Homes sa Capistrano ning syudad.
