Wala ganahi si Presidente Ferdinand Marcos Jr. sa pamahayag ni Chinese Ambassador sa Pilipinas, Jing Quan, kinsa namulong nga sigurado dali mudaug ang China kung gusto makiggubat ang Pilipinas.
Alang kang Marcos, ang maong pahayag dili mga diplomatikong pulong ug daw hulga kini batok sa Pilipinas.
Giklaro sa Pangulo nga nakahatag sa kabalaka ang gibutyag ni Jing tungod kay kini nagpakita sa agresibong tono nga dili angay sa mga nasud nga adunay diplomatikong relasyon.
Matod pa niya, “Well, it sounds very much to me like a threat, and it is not a very diplomatic statement to be made.”
Gipadayag usab ni Marcos nga kinahanglan nga masabtan sa gobyerno unsa gyud ang gipasabot sa Chinese Ambassador. Iyang giingon nga ang maong isyu angay nga hisgutan sa personal nga panag‑atubang tali sa Ambassador ug Department of Foreign Affairs (DFA).
Gipakita sa Pangulo ang iyang determinasyon nga panalipdan ang dignidad ug interes sa nasud pinaagi sa pag‑atubang sa maong pamahayag.
Ang iyang laraw nga mahinabi ang Ambassador nagpakita sa seryosong baruganan sa administrasyon batok sa hulga.
Gipahimangno ni Marcos nga ang Pilipinas dili mopasagad sa mga pulong nga makadaot sa relasyon diplomatiko ug sa seguridad sa nasud.
