CAGAYAN DE ORO CITY – Gihupay ni Cagayan de Oro 2nd District Rep.Rufus Rodriguez ang kahingawa sa Cagayanons kabahin sa expose nila ni Senator Panfilo Lacson ingon man Baguio City Mayor Benjamin Magalong nga halos 70 sa aktibong mga kongresista ang nagsilbi usab nga government project contractors.
Kini nga pagbulgar nila ni Lacson ug Magalong kinsa pulos kanhi top officials sa Philippine National Police/PNP nagsumikad sa kamanduan ni Pres Bongbong Marcos nga imbestigaran ang mga palpak nga flood control projects nga nahimong init nga isyu dihang gibaha ang dakong bahin sa Metro Manila ug Luzon provinces sa milabay’ng Hulyo ning tuiga.
Gibutyag ni Rodriguez nga pinakamaayo kini nga lakang aron malimpyuhan ang mga pangalan sa mga kongresista nga wala sukad nalambigit sa maong pasangil ilabina nga wala hinganli ni Lacson ug Magalong kung kinsa ang ilang mga gipangtubok.
Miingon ang magbabalaod nga dugay na kining nagsilbi nga kongresista nga nag-representar sa segundo distrito sa syudad sa kamara de representantes ug giingong wala kini sukad nalambigit sa nahisgutang pasangil.
Una nang namahayag si Rodriguez nga mas mayo nga imbestigar ni Marcos ang tibuok Pilipinas nga adunay susama nga pasangil aron magkasayranay kung kinsa ang mga tinud-anay nga kongresista nga mga kontraktor sa kaugalingong mga proyekto nga gipatuman sa ilang tagsa-tagsa ka mga distrito.
Hisayrang sukad tuig 2022 hangtod 2024, sobra uno trilyones pesos na ang nagamit nga pondo alang sa flood control projects apan pabiling dakong suliran ang isyu sa mga pagbaha kada-hapak sa mga bagyo sa Pilipinas.
