Wala mapugngan si House Committee on Justice Vice Chairman Rep. Ysabel Maria Zamora sa pagmando nga ipapanas ang mga pahayag ug komento ni Quezon City Rep. Bong Suntay kabahin sa actress nga si Anne Curtis.
Alang kang Rep. Zamora, offensive, uncalled-for, irrelevant, ug very unbecoming ang gisulti ni Suntay human niya gigamit ang imahe sa actress isip pananglitan sa hearing sa ikatulong impeachment complaint batok kang Vice President Sara Duterte.
Gipasabot sa babayeng mambabalaod nga dili angay nga muhisgot siya sa hearing bahin sa iyang “imagination” sa actress, ug labaw pa nga gi-timing kini samtang ang nasud nagselebrar sa National Women’s Month.
Tungod sa hitabo, nagmosyon si Zamora nga ipatangtang sa official record ang pahayag ni Suntay kay wala kini kalabutan sa subject matter ug klaro nga wala niya gitahod ang kababaihan.
Sa gawas sa Kongreso, ang actress nga si Jasmine Curtis-Smith, igsoon ni Anne, misaway usab kang Suntay ug gipamugos nga dili lang kini bahin kang Anne, apan usa ka porma sa pag-objectify sa kababaihan sa mga espasyo nga dominado sa kalalakin-an.
Una niini, si Suntay misulay sa pagdepensa sa iyang kaugalingon pinaagi sa pag-ingon nga igo lang kini mihatag sa compliment ug dili sexual o immoral.
Taliwala sa paningkamot ni Suntay, nakadawat gihapon siya’g backlash ug daghang nanawagan nga magpahayag siya sa public apology kang Anne Curtis ug sa kababaihan sa kinatibuk-an.
