CAGAYAN DE ORO CITY- Miggawas sa imbestigasyon sa Scene of the Crime Operatives o SOCO nga gipatay ayha gisunog ang usa ulitawo nga nakaplagan diha sa Bato,Sitio Kamakawan,Brgy Indahag ning syudad.
Ang biktima naila nga si Marjun Mejos taga Zone 1, Barangay Bonbon ning syudad ug criminology student sa usa sa mga tunghaan ning syudad.
Sumala ni SOCO-10 investigator Police Lt Paul Jean Ragmac nga namatay ang biktima human gibunalan sa hait nga butang ang iyang ulo hinungdan nga nakaangkon kini’g duha ka samad sa ulo.
Nagtoo usab si Ragmac nga kaila lamang sa biktima ang mipatay ug misunog niini. Hisayran nga kabahin nga gisunog sa suspek ang motorsiklo sa biktima.
Samtang gibulgar ni Cagayan de Oro City Police Office o COCPO spokesperson Police Lt Col Mardi Hortillosa nga may person of interest o POI na sila nga gisunod sa pagpatay ug pagsunog kang Mejos.
Si Hortillosa miingon nga may kasong frustrated homicide ang biktima human nakadunggab sa miaging tuig apan naka-pyansa.
Dugang ni Hortillosa nga ilang imbestigaran ang posibilidad nga may kalabutan sa iyang giatubang nga kaso ang motibo sa brutal nga pagpatay kaniya.
Giawhag ni Hortillosa nga Rico Sison nga gilayong mobisita sa ilang opisina aron mohatag katin-awan sa pagsilbi niining person of interest sa kremin.
