Gipahibalo ni Cuban President Miguel Diaz-Canel nga abli na sa panag-istorya ang Cuba sa Estados Unidos aron sulbaron ang ilang mga kalainan, taliwala sa grabeng krisis sa ekonomiya tungod sa ‘oil blockade’ nga gipahigayon sa administrasyon ni US President Donald Trump.
Matod ni Diaz-Canel, ang negosasyon nagtinguha nga malikayan ang komprontasyon samtang naglisod ang mga Cuban nga wala’y kuryente ug nag-atubang sa kakulang sa lana ug tambal.
Hisayran nga sukad sa pagkahulog ni Venezuelan President Nicolas Maduro nga maoy pinakadako nga kaalyado sa Cuba, gitakda sa Amerika ang pag-putol sa suplay sa lana ug naghulga sa taripa sa mga nasud nga mobaligya sa lana ngadto sa Cuba.
Sumala sa White House nga ang Cuba usa ka nasud nga nag-atubang sa kapakyasan human sa pagkawala sa suporta sa Venezuela ug sa paghunong sa Mexico sa pagpadala sa lana. (By Phillip Ariata)
