Gipamugos sa Philippine Movement for Climate Justice (PMCJ) Misamis Oriental–Cagayan de Oro nga ang dakong lunop nga nasinati sa syudad sa Iligan atol sa paglabay sa Bagyong Basyang usa na ka klarong timailhan sa climate emergency, ug dili na lamang usa ka epekto sa kasagarang climate change.
Gibutyag ni Lyn Sabellano, Community Campaign Officer sa PMCJ Mis.Or–CDO, ang nahitabong dakong lunop sa Iligan dili na matawag nga flash flood, kundili usa ka pamatood nga grabe na ang kausaban sa klima sa nasud ug sa tibuok kalibutan.
Matod pa niya, usa kini ka seryosong pahimangno sa katawhan nga naupaw na ang daghang kabukiran sa rehiyon, ug nangawala na ang dagkong mga kahoy nga kaniadto adunay lig-on nga gamot nga makatabang sa pagpugong sa kusog nga bug-os sa tubig-ulan matag bagyo.
Tungod niini, diretso na nga mudagayday ang tubig-ulan padulong sa mga komunidad, hinungdan nga makasinati ang mga residente sa kalit ug dili damhang kataas sa baha, bisan pa man dili kusog ang mga bagyong moagi sa lugar.
Source: Bombo Hanay sa Udto, written by James Oliver
