CAGAYAN DE ORO CITY – Gitumbok nga ang gitawag nga ‘Santa Ana Winds’ o tawgon usahay nga ‘Devil Winds’ ang rason kung nganong nakasinati sa lapad nga wildfires ang Los Angeles,California,USA.
Kini ang pagsaysay sa Filipino-American nga si Dorothy McCoy nga taga-Cagayan de Oro City ug dugay nang nagpuyo sa Amerika diin apil na ang ilang lokasyon nga namiligro nga maabtan sa kalayo.
Saysay niini nga dili pa unta sila angay makasinati sa maong klase sa panahon kay ting-tugnaw pa ang ilang klima apan pirmi usab sila duawon sa devil winds pag-abot sa Enero.
Dugang ni McCoy nga gikondesyon na nila ang ilang kaugalingon nga posibleng mapabakwit sa nakapalibot nga convention centers sa estado kay duol na ang kalayo sa ilang lokasyon.
Sulti usab sa ilang state weather bureau nga molungtad pa ang Santa Ana Winds hangtod sa adlaw’ng Sabado ayha kini molayas sa teritoryo sa Los Angeles, California nga ilado nga nagbaton sa labing nindot nga panahon sa Amerika.
Dumduman nga ang maong estado ang gipuy-an usab sa daghang Holloywood celebrities tungod sa kanindot sa klima.
Hisayrang ang Santa Ana Winds ang gikan sa usa ka bugnaw ug dry high pressure air masses gikan sa Great Basin nga makamugna’g mga pagsunog.
