CAGAYAN DE ORO CITY – Daw gibasol sa anak nga doktor ang iyang kaugalingon nga pakyas niya maluwas ang inahan nila sa dugu-ong aksidente nunot sa panagbangga sa duha ka pribadong sakyanan sa diversion road sa Zone 1,Brgy Barra,Opol,Misamis Oriental.
Kini human igo na lang sa pagdanguyngoy paghilak si Dr. Jude Rey Pagaling sa sakit nga kamatayon sa ilang inahan nga si Engr Evelyn Pagaling nga gisugat nila sa Laguindingan Aiport gikan sa bakasyon sa Amerika aron mouli sa Malaybalay City,Bukidnon.
Miingon ang maong doktor nga sobra ka dakong kawad-on sa ilang pamilya ang hitabo kay mismo siya ang nahaw-as sa grabeng depresyon dihang nagbaton sa isyu sa mental challenge sa miaging katuigan.
Hisayrang namatay ang ilang inahan ug unom ang samaron kay gibanggaan ang gisakyan nila nga Ford Expedition sa laing Ford Everest nga gimaneho sa menor de edad nga taga-Zone 7,Brgy Bulua ning syudad sa miaging gabii.
