Malampusong gilusad sa Bombo Radyo Philippines ang Dugong Bombo 2026: A Little Pain, A Life to Gain, ang tinuig nga nationwide blood donation drive niini inubanan sa Bombo Radyo Philippines Foundation, Incorporated ug sa Philippine Red Cross.
Dungan nga gihimo niadtong Nobyembre 14, 2026 sa tibuok Pilipinas, nakatigom ang Dugong Bombo og kinatibuk ang 1,964,250 cubic centimeters nga dugo, nga susama sa gibanabanang 1,964 ka litro, 518 ka galon, o hapit napulo ka drum nga dugo, gikan sa kinatibuk ang 4,365 ka malampusong blood donors sa tibuok nasud.
Nagpaabot og kinasingkasing nga pasalamat ang Bombo Radyo Philippines ngadto sa tanang malampusong blood donors, lakip na niadtong nagparehistro apan wala makadonar tungod sa mga rekisitos sa medical screening.
Gipaabot usab ang kinasingkasing nga pasalamat ngadto sa tanang partners, local government units, civic ug community organizations, volunteers, ug nagkadaiyang grupo diin ang ilang bililhong suporta nakatampo sa kalampusan sa Dugong Bombo.
Ang hapit napulo ka drum nga dugo nga natigom makatabang sa pagpuno sa suplay sa dugo sa mga blood banks, ilabi na taliwala sa nagpadayong panginahanglan alang sa blood transfusions ug mga emerhensya sa panglawas.
Kining nasudnong paningkamot makaseguro nga mas daghang pasyente ang makakuha og dugo nga makaluwas sa kinabuhi sa panahon nga labing gikinahanglan nila kini.
Ang Bombo Radyo Cagayan de Oro nakatigom og 148,500 cubic centimeters nga dugo, nga susama sa 148.5 ka litro o 39.2 ka galon, gikan sa 330 ka malampusong blood donors atol sa aktibidad nga gihimo sa University of Science and Technology of Southern Philippines Gymnasium kagahapong adlawa, Sabado, Nobyembre 14. Ang maong ihap mas taas kon itandi sa 245 ka malampusong donors niadtong tuig 2025.
Labaw pa sa usa ka blood donation drive, gipakita sa Dugong Bombo ang tinuod nga espiritu sa kaluoy, pagkamanggihatagon, ug tinabangay. Ang matag donasyon sa dugo nagrepresentar sa paglaom ug laing higayon aron makaluwas og kinabuhi.
Ang mga malampusong blood donors nakadawat og espesyal nga gidisenyong Dugong Bombo t shirts, hot meals, bitamina, snacks, ug mainom.Ngadto sa tanang midonar, misalmot, miboluntaryo, ug misuporta sa kampanya, daghang salamat sa paghimo sa Dugong Bombo 2026 nga usa ka dakong kalampusan. Dugong Bombo 2026: A Little Pain, A Life to Gain. Basta Radyo… Bombo!
