Gisiguro sa Commission on Elections Region 10 nga andam silang mopahigayon og duha ka managlahing pagpili sa tuig 2028 kon madayun ang pagbalhin sa Barangay ug Sangguniang Kabataan Elections o BSKE nga idungan sa presidential elections.
Gikumpirma ni COMELEC Region 10 Director Atty. Renato Magbutay nga nakasulay na kaniadto ang ilang buhatan nga magpatuman og national elections sa bulan sa Mayo nga ginasundan usab sa BSKE sa bulan sa Oktubre sulod lang sa usa ka tuig.
Apan gipamugos sa opisyal nga dili pwedeng usahon sa usa ra ka adlaw ang duha ka pagpili tungod kay automated ang matag national elections habig sa mga lokal nga lider samtang manual usab ang pamaagi sa BSKE.
Tungod niini, nanawagan ang buhatan ngadto sa Kongreso nga tagaan sila og sakto ug igo nga pondo aron dili mababagan ang ilang pagpangandam sa duha ka dagkong eleksyon.
