Photo fromJhanric’s Blog –
CAGAYAN DE ORO CITY-Gitin-aw sa Department of Health o DoH-10 nga sa adlaw’ng Biyernes pa mahibal-an ang hinungdan sa pagkahilo sa pagkaon sa 180 ka miembro sa Seventh Day Adventist Reform Movement sa Cedar Resort,Brgy Impalutao, Impasug-ong,Bukidnon.
Si DoH spokesperson Dr. David Mendoza miingon nagpadala na siya’g team aron maoy mag-atiman sa mga biktima nga nakasinati sa pagsakit sa ilang mga ulo,pagsuka-suka ug pagkahilo human makakaon sa ilang panihapon.
Sa maong ihap, 116 kanila ang gidala sa Bukidnon Medical Center; 10 sa Malaybalay Polymedic General Hospital; 21 sa Bethel Baptist General Hospital ug 33 sa St . Jude Thaddeus General Hospital.
Anaa na sa libo ka ka miembro sa SDA ang mitambong sa National Youth Convention nga naggikan sa Cotabato City, Bohol, Negros Oriental, Ilo-Ilo City ug Zamboanga City.
Samtang pugngan sa DoH -10 nga dili na madugangan pa ang ihap sa mga batan-on nga na-igo sa food poisoning.
Sumala ni Mendoza nga prayoridad sa iyang gipadala nga team mao ang pagseguro nga anaa sa luwas nga kahimtang ang mga biktima pinaagi sa paghatag sa insaktong tambal kanila.
Siya miingon nga mohimo usab sa pakisusi ang ilang mga personahe sa hygiene sa mga biktima ingon man ang sitwasyon sa ilang palibot ilabina ang tubig nga ilang giinom.
Una niini, tulo ka adlaw nga magpahigayon sa ilang convention ang mga batan-on sa maong lugar nga gipanguluhan ni SDA Reform Movement-Northern Mindanao Field President Pastor Allan Alingalan.
