Nanawagan si Konsehal Girlie Balaba kang Mayor Rolando “Klarex” Uy nga manginlabot sa plano sa Tourism Infrastructure and Enterprise Zone Authority (TIEZA) nga PASIRAD-AN ang Gardens of Malasag Eco-Tourism Village sa Disyembre 2025. Ugat hinungdan niini ang pagtak-op sa kasabutan sa DENR ug sa nagdumala sa Eco Village.
Gipasabot ni Balaba nga ang unom ka ektarya nga eco-village sa Barangay Cugman usa sa importante nga lugar alang sa ekolohiya, kultura, ug turismo nga angay protektahan.
Gikonsiderar sa konsehal ang maong luna isip “environmental lungs” sa Cagayan de Oro ug nagtipig sa bahandi sa kultura sa mga lumad.
Si Balaba, kinsa chairperson sa komitiba sa turismo, namahayag nga kapin 46 ka empleyado ang mawad-an sa trabaho kon mahinayon ang pagsirado sa Eco Village.
Tinguha sa komite nga makignegosyar ang lokal nga kagamhanan sa DENR aron makab-ot ang mas maayong kasabutan sa pag-abang sa maong pasilidad ug ma preserbar ang nahisgutang eco-tourism spot. Hisayrang ang Gardens of Malasag Eco-Tourism Village unang gidumala sa National Tourism Authority ug Philippine Tourism Authority niadtong 1991, ug human niini, gipasa ngadto sa TIEZA alang sa pagpalambo ug pagbag-o sa maong pasilidad.
