GIPASIDAAN ni MSME RDC Chair Ray Talimio Jr. nga mahimong maapektuhan ang dagan sa ekonomiya sa nasud kon magpadayon ang impeachment proceedings batok kang President Ferdinand Marcos Jr. ug Vice President Sara Duterte.
Namahayag si Talimio sa Bombo Radyo nga ang performance sa ekonomiya karong tuiga kinahanglan pagabantayan, ilabi na sa negatibong imahe nga gihimo sa nasud tungod sa mga kasong politikal nga giatubang sa duha ka pinakataas nga lider niini.
Matod pa niya, naka-depende sa kahimtang sa ekonomiya ang mahimong epekto niini sa pagtubo sa Gross Domestic Product o GDP sa nasud.
Gidugang ni Talimio nga gipaubos na sa Bangko Sentral ng Pilipinas ug International Monetary Fund ang ilang forecast sa GDP ngadto sa 5 percent ubos sa normal nga kahimtang, nga mas ubos sa 5.5 percent nga target sa gobyerno karong tuiga.Apan kon adunay maaprobahang impeachment, posible matod pa nga mas muubos pa ang economic growth sa nasud. (James Oliver)
