Education Caravan ang gikinahanglan sa katawhan aron mapasar sa hingpit ang Anti-Political Dynasty Bill sa Pilipinas. Kini ang tinguha sa grupong IDEFEND Mindanao, aron mas mapalig-on ang partisipasyon sa katawhan sa demokrasya.
Namahayag si Adrian Jay Espiritu, miyembro sa maong grupo nga kinahanglan mahibalo ang kadaghanan sa dili maayong kahimtang kung ang gahum sa pagdumala huptan lamang sa pipila ka mga pamilya.
Iya usab gipasabot nga, bisan sa lokal o nasyonal nga lebel mas maayong makita sa gobyerno ang managlahing opisyal ug dili limitado sa mga pamilyang adunay kuwarta, impluwensya, o nailhang apelyido.
Namugos ang IDEFEND Mindanao nga daghang Pilipino ang adunay kapasidad ug abilidad sa pagdumala apan wala lamang mahatagi’g suporta o kahigayonan nga mailhan.
