CAGAYAN DE ORO CITY – E-deklara nga PERSONA NON GRATA sa konseho ang usa ka event coordinator nga si Michael Moca sa sa Brgy Macabalan ning syudad.
Kini human daghan sa mga kaslunon ang giingong giilad sa maong suspek pinaagi sa pagpangayo’g dagkong kantidad sa salapi aron mahan-ay ang kasal apan kutob lang diay sa estorya.
Namahayag si Macabalan Punong Brgy Daniel Raypon nga moduso sila’g resolusyon sa ilang sesyon aron e-kondinar ang giingong binuhatan ni Moca ngadto sa mga kaslunon.
Siya miingon nga halos napulo ka summon na ang ilang gihimo apan pulos wala tungahi sa suspek.
Gani,pipila usab sa mga kaslunon gikan sa Brgy Puntod ang nakasinati sa susama nga reklamo nga gisagubang sa pipila ka residente sa Brgy Macabalan.
Sa pagkutlo ning balita, wala pa’y ilhanan nga mopakita si Moca aron tubagon ang nabaniug nga impormasyon sa Bombo Radyo kabahin sa daghang kaslunon nga iyang nasaaran nga serbisyuhan.
